تعرف علي نظام الإنتخابات الأمريكية... غير مصر تماما
بالعامية_هنتكلم :
لو حابب تعرف ايه اللي بيحصل حاليا في الإنتخابات الامريكية وايه موضوع عم ترامب اللي عاوز يقلب الترابيزة وليه؟ فانت في المكان المناسب، واوعدك بعد قراءة الكام كلمة دول هتبقى بتابع الأحداث غير اي حد..هتكون فاهم..
اول حقيقة هتعرفها النهاردة ان كل رؤساء امريكا السابقين طالعين من حزبين فقط اللي همه " الديموقراطي " والحزب " الجمهوري" ومحصلش في تاريخ امريكا ان حد مستقل بنفسه كده وغير منتمي لحزب يكسب الانتخابات الا مرة واحدة بس وهو الرئيس " جورج واشنطن"..
نبدأ في طريقة الانتخابات:
وهي بالمناسبة معقدة جدا لدرجة ان نص الأمريكيين مش فاهمانها اصلا وعلشان تفهم اكثر فمبدئيا كده الناس اللي انت بتشوفها واقفة بتدلي بأصواتها امام صناديق الإقتراع دي مش زي مانت فاهم همه فعليا مبيكتبوش اسم اي حد من المرشحين ولا فيه اي مرشح اصلا بيتكتب اسمه دول بيكتبوا اسامي ناس ثانية خالص وخليني افصلك اكثر..
اللي بيحصل باختصار ان امريكا عبارة عن 50 ولاية كل ولاية بيترشح منها مجموعة مندوبين معروفين في كل ولاية وعددهم 538 مندوب وكل مندوب من دول بيبقى معروف هو تابع لمين من المرشحين ( ترامب – بايدن في حالتنا) وبيبقى متعهد بده قدام القانون..
يعني مثلا خلينا نقول ان ولاية زي " كاليفورنيا" فيها 55 مندوب وهي اعلى ولاية بالمناسبة وقطعة الكيك ام كريز.. كل مندوب من ال 55 دول بيبقى معروف انك لو كتبت اسمه صوتك ده هيروح لمين من المرشحين..
ببساطة اكثر خلينا نقول ان "x" واحد من ال38 دول وهو كاتب في البروفايل بتاعه انه هيدعم ترامب فيبقى كل مرة انا هكتب “ X” هيعتبر ده تصويت لترامب وهكذا..
حاجة كمان مهمة:
كل ولاية فيها عدد مندوبين بيتناسبوا مع عدد الناخبين في كل ولاية وهمه اللي هيحددوا مين هو رئيس أقوى دولة في العالم وهم ( 538 مندوب ) واسمهم ( الهيئة الإنتخابية - Electoral college)وعلشان نقدر نقول ان المرشح ده فاز بمقعده في البيت الابيض لازم يكون كسب 270 صوت اللي هو اعلى من النصف بواحد ( 269 +1 ) ..
عرفنا كده موضوع النواب –باختصار- نخش على ترتيب الولايات:
من دون ال 50 ولاية هتلاقي كل مرشحين للإنتخابات الأمريكية بيركزوا على ست ولاية باعتبارهم همه اعلى نسبة فيها ناخبين وهم بالترتيب كده ( كاليفورنيا – تكساس – نيويورك - فلوريدا – بنسلفانيا – إلينوي ) ودول لوحدهم بيمثلوا 35% من الكتلة الإنتخابية واللي بيفوز في اي ولاية بيكسب جميع الأصوات في الولاية دي حتى لو فارق بصوت واحد فقط..
كده انت اخذت فكرة لا بأس بها عن النظام الانتخابي تعالى بقى للي بيحصل دلوقتي:
لازم تكون عارف ان الإنتخابات المرة دي مختلفة لسببين :
-الاول هو التصرفات من احد المرشحين واللي لما وجد انه بيخسر بيحاول يقلب الطاولة وطبعا تصريحاته النارية بتشجع انصاره انهم يقوموا بمظاهرات ظنا منهم ان في تلاعب في النتائج.
-الحاجة الثانية ان دي اكثر انتخابات في تاريخ امريكا اللأمريكيين والعالم كله مرتقبها وبتعتبر اعلى نسبة تصويت في تاريخ أمريكا ( غالبا حزب الكنبة نزل )..
طيب ايه بقى سبب غضب السيد ترامب وايه سبب الإحتجاجات ماهو كل حاجة ماشية زي لفل اهيه وفي عرس ديموقراطي بيسطع اهو؟
شوف:المفروض الاصوات اللي اتعملت عند الصناديق مباشرة دي كانت معظمها لاصحاب ترامب (لان هما دول اللي مش معترفين بالكورونا ولا تباعد اجتماعي .. فاللي حصل ان دي اول اصوات اتعدت ، فكان باين ان ترامب فايز فوز ساحق و فضل يفتخر بالحوار ده وينزل في تويتات عنترية..
لحد ما الكل تفاجأ انه في خلال يوم بايدن تقدم على ترامب في Pennsylvania و Georgia و Nivada ودول كان فايز فيهم ترامب عشان الاصوات بتاعته ( بايدن) اللي بالبريد بدات توصل وده لإن غالبية انصاره خايفين من الكورونا وبيحافظا على التباعد.
عشان كده السيد " ترامب" عمال يعيط يقول وقفوا العد وبتاع علشان يضمن ان أصوات البريد اللي هي بتدعم بايدن متتعدش..
طيب ايه الوضع دلوقتي؟
حاليًا السيد " جو بايدن" متقدم بعدد 264 صوت يعني ناقصله 6 اصوات ونقول له مبروك واللي بيحصل دلوقتي حالا اهو ان كل الأمريكيين والعالم مستني بترقب على قدم وساق نتيجة ولاية Nivada ودي عليها ست نقاط ولو فاز فيها " بايدن " هيعتبر فاز بالرئاسة..
فعلشان كده نيفادا هي ولاية الحسم والعالم كله مستني نتيجيتها علشان يعرف مين اللي هيكون معاه اكواد وشفرات اقوى سلاح نووي في العالم..
وبالمناسبة اصحاب نظرية المؤامرة بيقولوا ان النتيجة حسمت لصالح بايدن بس مستنيين يعلنوا النتيجة لحد ما يسيطروا على الاحتجاجات اللي عاملينها انصار ترامب..
دي الحكاية بإختصار واعتقد انك دلوقتي بقى عندك صورة اوضح تخليك تتابع القادم وانت مش زي اي حد.. وان شاء الله هعمل مقال مفصل عن عم " بايدن " في حالة فوزه..
انا خلصت وحابب افكرك متنساش الشير والمنشن لأصحابك خليهم يفهموا اللي بيحصل في اقوى دولة في العالم همه كمان..
إرسال تعليق